Culezion particulera: Ueves da Pasca depënc a man tl Museum Gherdëina
40 pec unics dl'artista Aurelia Langer di ani 60 – Uef particulér dl Lusenberger
Te Gherdëina à i ueves depënc da Pasca gran tradizion y perchël ne n’iel nia da se fé marueia che l’artista tole ca tl cajo di ueves, simboi coche la fertilità y la ressurezion per crië si pitla operes artistiches.Dai 16 de fauré inant nchin ai 30 de merz iel da udëi tl Museum Gherdëina a Urtijëi, 40 ueves depënc a man dal’artista Aurelia Moroder Langer ti ani '60. Leprò iel nce n unicat: l uef particulér dla familia de artisć da Jumbierch.
Nspireda dal ciastel „Fischburg“, la dlieja da Sacun, formes de ciofs y dantaldut motifs de mutons che fej damat o che sona n strumënt de Berta Hummel, à Aurelia Moroder Langer tëut ejëmpl y depënt pona sun crosa. L talënt de Aurelia ti ie bele unì metù te cuna, davia che la fova na muta de bera Śepl Moroder da Jumbierch, un di artisć plu cunesciui de Gherdëina.
N 40 ueves che anda Aurelia Langer à depënt danter i ani 1959 y 1969, ie śën metui ora per n valgun’enes te na vidrina njinieda ca aposta tl Museum Gherdëina. Tlo possen nce amiré n uef defin particuler. L ie chël che bera Śepl ova giapà, aldò dl'usanza te Gherdëina, da si nevicia Annamaria Sanoner da Mauriz n l Lunesc de Pasca dl 1869.
Tla crosa depënta a cueciun iel tlo crazei ite nia mé strumënc de mujiga cun ciofs y cueres, ma nce n ferssl d’amor de cin’risses. L uef dl Lusenberger se à cunservà per ntier do feter 150 ani.
Daujin a chisc unicac iel mo metui ora n valgun pec che à da nfé cun la tradizion da Pasca; n liever da Pasca turnà y aniei, juesc per mutons y na racia.
La mostra ie da udëi tla sala dla chiena tl Museum Gherdëina a Urtijëi, dai 16 de fauré inant nchin ai 30 de merz, dal merdi al vënderdi, dala 14:00-18:30.
Museum Gherdëina
Cësa di Ladins, Str. Rezia 83
39046 Urtijëi
www.museumgherdeina.it
Per d’autra nfurmazions:
Paulina Moroder, diretëura dl Museum
Isabell Pitscheider, curadëssa dla mostra
e-mail: info@museumgherdeina.it
