Mejes storics de Gherdëina śën nce da udëi tl Arlberg

I mejes storics de Gherdëina ie da udëi ntan dut l mëns de utober tl Arlberg- scenoauter tla forma de na mostra itineranta che ie unida giaurida la sada passeda tl “Museum im Wald” tl Klostertal.

La mostra itineranta dl Museum Gherdëina dal titul: „Mejes - la memoria de na cuntreda“ fova bele njinieda dal 2019. Per l Museum dl Arlberg ie chësta mostra n cumplemënt a si pruiet “Historische ArchitekTouren“, pra chël che ëi se à dat ju cun la tueda y documentazion dl’architetura de si cuntreda. “La mostra sun i mejes tl Klostertal Museum dà la puscibltà de udëi sëura i cunfins ora”, dij l presidënt dla lia dl Museum, Christof Thöny.
Il Museum Gherdëina ne se dà te si pruiet “Mejes” nia mé ju cun la documentazion. “Nosc pensier ie chël de sensiblsé l plu che la va la populazion per si particulariteies, per si belëzes y per l valor culturel de nosc parimone architetonich, cun l fin dl varenté per la generazions che vën do”, dij Paulina Moroder, diretëura dl Museum.

N sada ai 2 de utober ie unida giaurida la mostra „Mejes” tl Museum Klostertal. L fova leprò l sëurastant dla lia dl Museum Klostertal, Christof Thöny, la cuordinadëssa Kathrin Novis, l assessëur regiunel y culturel dla zità de Bludenz Christof Thoma, l fotograf Václav Sèdy y la diretëura dl Museum Gherdëina, Paulina Moroder.

Tlo van al film

Museum Klostertal