Referat “Paesaggio sonoro” (cuntreda sunënta): la cuntreda culturela cun duc i sënsc

L filosof y architet Martino Mocchi rejona n vënerdi, ai 16 d’auril, stlujan via la lingia de refererac dl Museum Gherdëina

Per pudëi ntënder la cuntreda culturela y nfluenzé positivamënter si svilup ne iel nia assé la giudiché
visualmënter. La cuntreda dëssa al cuntrer unì perzepida cun duc i sënsc. Chësta tesa nueva scialdi nteressanta vën prejenteda dal architet y filosof Martino Mocchi tl cheder de n referat tl Museum Gherdëina cun chël che l vën stlut ju n vënerdì, ai 16 d’auril la lingia de referac sun la storia y l daunì dla cuntreda culturela.

Tl mond uzidentel, nsci Mocchi, vën la cualità de na cuntreda n generel mé giudicheda aldò de si cialé ora y
chësta pruspetiva vën sotrisseda mo deplù dal’unipresënza de imajes. “Ma canche l se trata de crië n liam cun
na cuntreda, de fé che la devënte pert de nosta identità ie elemënc multisensoriei de mpurtanza zentrela”,
nsci Mocchi. Nce l fat de se sentì da cësa y segures te na cuntreda ie n elemënt mpurtant per si defendura y
mantenimënt.
L ie perchël de mpurtanza slargë la ududa sun la cuntreda culturela y si svilup tres la cumponënta visuela,
tlarësc Mocchi, che à svilupà l cunzet dl “Paesaggio sonoro” – la cuntreda sunënta. Chësc cunzet de perzepì la
cuntreda cun duc i sënsc ie tl zënter dl referat digitel per l Museum Gherdëina. L referat unirà tenì n vënerdì, ai
16 d’auril dala 18.00. La partezipazion ie debant y l link curespundënt ie da avëi sun la plata web
www.museumgherdeina.it.
L referat de Mocchi ie l ultim de na lingia de referac online sun la cuntreda culturela sciche lerch de vita
chersciuda storicamënter, sun si storia y daunì. I prim doi referac dla lingia, i referac dla prufessëura emeriteda
dla Università de Pavia, Luisa Bonesio, y chël de Annibale Salsa, antropologh culturel y ex-presidënt dl CAI, à
bele descedà gran nteres. “Ënghe perchël ne ulons nia taië via la reflescion sun l svilup de nosta cuntreda
culturela y do l referat de Martino Mocchi jirons d’autonn inant cun la lingia speran che l sarà inò puscibl audì i
referac n presënza”, dij la diretëura dl Museum Gherdëina, Paulina Moroder.
La lingia de referac ie lieda al gran proiet “Mejes – luesc da paur te Gherdëina: la memoria de na cuntreda“
cun chël che l Museum Gherdëina à metù tla lum ntan i doi ani passei l sfanté di mejes storics y la mpurtanza
de si mantenimënt y recualificazion.

Per deplù nfurmazions:
Dut.a Paulina Moroder
Diretëura dl Museum Gherdëina
Tel. +39 338 6040477
E-mail: p.moroder@museumgherdeina.it