Viac culturel a Oberammergau

cun vijita meneda al Ciastel Linderhof y tl MuseumSada, 25 de utober 2014

Care cumëmbri y amics dl Museum Gherdëina!

Ve nvion de cuer deberieda cun vosc cumpanies y cunescënc a na jita culturela de un n di a Oberammergau.
Danmesdì ons na vijita al Ciastel Linderhof che ie mé a puec chilometri da Oberammergau. Chësc ie un di trëi ciastel, che Rë Ludwig II dl Bayern à fat su
y l sëul che ël à pudù udëi finà tl stil rococo.
La marënda ons apustà tla ustaria storica dl zënter, “Alte Post”.

Domesdì jons tl Museum Oberammergau che ie vis-à-vis dla ustaria, iló arons na vijita meneda cun la diretëura dl museum.
La rica culezions storiches d’ert y artejanant dl ziplé de Oberammergau nes porta ndëur tl cuer dl mond dl 18ejem secul, fajan ntendër la vedla relazions economiches y cultureles che à caraterisà l svilup dl artejanat te nosta valeda.
Dan furné inò zeruch a cësa dala sies dassëira, saral mo tëmp assé per fé na raida tl luech. L viac cun la curiera dura zirca doi ëura y mesa.

Prugram dl di:
7.00 Muvon cun la curiera da Urtijëi demez, plaza S. Antone
10.30 Vijita meneda tl Ciastel Linderhof
12.30 Marënda tla ustaria “Alte Post”
15.00 Vijita meneda tl Museum Oberammergau
18.00 Dajon ëuta de viers de cësa

Per nfurmazions y per se nuté possen passé tl Museum Gherdëina nchin ai
17 de utober 2014 (lunesc a vënderdi, dala 9.00-12.00), tel. 0471 797554

Priesc de iscrizion:
60 Euro per cumëmbri, 65 Euro per nia cumëmbri (tl priesc laite iel l viac
cun la curiera, la doi ntredes cun vijites menedes y la marënda).