Sëira y mostra n lecord dl scultëur Albino Pitscheider

N sada, ai 10 de merz, iel unit lecurdà tl Museum de Gherdëina a Urtijëi l bon mòster Albino Pitscheider n ucajion di 50 ani da si mort. L Museum ti à dedicà na mostra nueva y valorisà la gran culezion d’ert duneda tl 1987 dala fians dl artist anda Rosa y anda Anna. Presënc fova nce truep scultëures dla valeda. La mostra ie mo da udëi nchin ai 31 de merz.

Albino Pitscheider à mo gudù de na furmazion classica tla vedla berstotes che laurova d’auteresc a Urtijëi sun la fin dl Nuefcënt. Cun spirt daviert ti iel jit permez al’inuvazion dl’ ert dl vintejim secul, tulan su la stiera da maester tla scola prufescionela de Sëlva y deventan n bon mòster per de plu cënc de sculeies. Tres si maniera persunela de ziplé tl lën de zirm scultures de mëndra dimenscions al furmà pea la storia dl artejanat de Gherdëina, ti dajan n mpuls mpurtant al’economia. Truepa families dantaldut te Sëlva y a Santa Cristina ti ie de gra a bera Albino per avëi mparà da d’ël a ziplé. Ex sculeies che ie mo n vita l lecorda mo ncueicundì cun gran stima y amor.

Jic permez ala culezion di lëures ne ti iesen nia dal pont de ududa dl critich d’ert, ma da chël dl storich, presëntan sëtanta lëures ora de duta si fases criatives nchin al ultim lëur ziplà tl 1961 cun 84 ani. Danter chisc iel nce pec nueves che ne fova nia da udëi ti utimi ani. N pëis particuler ti iel unit dat ala trasfurmazion stilistica tl’ ert sacra ti ani Vint, de gra al impuls dl Art Nuveau purtà te Gherdëina dal diretëur artistich nuef dla doi scoles prufescioneles de Urtijëi y Sëlva Guido Balsamo Stella. Dl 1925 ie l bel Crist de Albino Pitscheider, che ti ova purtà ite la medaia d’or pra la Mostra mundiela dl artejanat a Paris. N auter aspet a chël che l ti ie unit dat pëis tla mostra ie la pitla scultures y miniatures di ani Cincanta y Sessanta zipledes de capriz, che lascia luné ora l spirt religëus senzier ma nce l bon umor de n artist che ne à mei ulù vester deplù de chël che l fova, povester nce pervia dl dulëur che l à abù da superé te si vita, na persona n pesc cun sé nstëssa. La mostra „Albino Pitscheider, l bon mòster dl artejanat de ziplé“ ie mo da udëi nchin ai 31 de merz tla gran sala dla scultura dl Museum Gherdëina a Urtijëi.