Piazza / Mureda: Giaurida la mostra tla Cësa de Cultura a Urtijëi
Sies dejenëies de produzion artistica de doi di artisć plu nfluenc de GherdëinaGenerazions d‘artisć y artejans de Gherdëina à nfluenzà Raimund Mureda y Luis Piazza, tramedoi ie reprejentanc mpurtanc dla szena artistica de Gherdëina dl 20ejim secul.
N ucajion de si 110ejim cumpliani y dl 60ejim aniverser dla Lia dl Museum iel unì giaurì n sada, ai 6 d‘utober tla Cësa de Cultura de Urtijëi na mostra che dà na bela sëuraududa di lëures de Piazza y Mureda. La mostra ie da udëi nchin ai 28 d‘utober.
Partida su te dejenëies gëura la mostra tres scultures y chedri da culezions privates, lëtres y anutazions na ududa sun la vites paraleles de Luis Piazza y Raimund Mureda. I vijitadëures possa nsci cunfrunté i lëures de tramedoi ti medemi ani y cunscidré si svilup artistich dai ani 1930 nchin ti ani 1980: dal scumenciamënt al tëmp dla furmazion y a chël canche i ie ruvei a n si stil nchin ala sperimentazion cun tecniches y tematiches nueves.
L’esposizion mostra nce l svilup dla szena artistica te Gherdëina tl 20ejim secul y coche l’ert moderna se à svilupà ti ani 1950, 1960 y 1970 desman dai zëntri dl’ert. Nteressantes ie oradechël la paraleles tla vites de Luis Piazzas y Raimund Mureda, che ne ie nia mé nasciui tramedoi dl 1908 y che à nsenià ani alalongia tla Scola d’ert de Gherdëina, ma che à nce nfluenzà l svilup dl’ert de nosta provinzia per ejëmpl fajan pert dl Südtiroler Künstlerbund.
Metuda a jì ie la mostra unida dal Museum Gherdëina n culaburazion cun la families di doi artisć y la storica d’ert Danila Serafini. Che iust l Museum mët a jì na mostra de Piazza y Mureda ne ie nia n cajo: i doi artisć ie danter i cumëmbri fundadëures dla Lia dl Museum. Chësta ie nasciuda dl 1958 y ie nsci una dla plu vedles dl Südtirol.
Da udëi ie la mostra sun la vita y i lëures di doi artisć Luis Piazza y Raimund Mureda tla Cësa de Cultura de Urtijëi nchin n dumënia, ai 28 d’utober, dal lunesc al vënerdì dala 10.00 ala 12.00 y dala 15.00 ala 18.00, sada y dumënia dala 10.00 ala 12.30. De plu nfurmazions ie da liejer sot a: www.museumgherdeina.it.